٢٩ سەفەر، ١٤٣٩هـ
قەبارەی نووسین

عەلمانیەتی ڕۆژهەڵاتی و حزبی كوردی

دەروازەیەك

ناونیشانی وشەی (عەلمانیەت)م بەكارهێنا بۆ ئەوەی خوێنەر بزانێ‌ لە چی دەدوێم، ئەگەر نا ئەو وشەیە بەقەد بزافێكی شێوێنەر پڕ دیماگۆژی، دۆگماكانی عەلمانیەت دەشارێتەوە! بە واتای وشەكە، چەمكەكە بە ڕونی دەرنابڕێ‌ دەبێتە ناوەندێك و هەتا هزرو ئایدۆژیاو فەلسەفەیەك چەندەها تەئویلی پۆزەتیڤ و نێگەتیڤ هەڵبگرێ‌.پ.ی.سەلام ناوخۆش

هەرچی (secularism)ی ئینگلیزیە و(luicism)ی فەرەنسی یە ئەو شێواندنەی تێدا نیە، بۆ من لەم نوسینەدا زیاتر ئەو دووە بەكار دەهێنم نەك عەلمانیەت!

لە لایەكی ترە، هەروەك ناونیشانەكە پێشنیاز دەكات پێم خۆشە لە بنەمای عەلمانیەتی ڕۆژهەڵاتی بدوێم و بە حكومی ئەوەی حزبی كوردیش هەر لەسەر بنەماكانی ئەو جۆرە عەلمانیەتە دامەزراوە و ڕوئیاو پەیامیشی هەرزیاتر كۆپی ودرێژەپێدەری ئەوانە، لەم بوارەش، كە قسەی لەسەر كراوە بۆیە نوسینەكە لەم چوارچێوەیە دەرناچێ‌ و ڕوبەرەكەی هەرئەوەندە دەبێ‌ نەك شامیل و هەمەلایەن بێ‌.

 

عەلمانیەت و ئارێشەی زاراوە لە ڕۆژهەڵاتدا

ڕۆشەنبیرو حزبی ڕۆژهەڵاتی كێشەی ناسنامە یەكێ‌ لە ئەدگارە بنەڕەتییەكانی (ئەو) ناتوانێ‌ لە (نیفاقی سیاسی) (نیفاقی كۆمەڵایەتی) و (نیفاقی ئاینی) نەژی، چونكە (مانەوەی) و (هەبونی) وابەستەی ئەو حاڵەتەن! ڕونتر ڕاشكاوانە تر بێژین، ئەو خوێندەوار و قەڵەمبدەست و شەهادەدارنەی ڕۆژهەڵات ئەوانەی دەیانەوێ‌ لە دەرەوەی هەژمونی دین و دونیا وڕوئیای دین بە تایبەتی ئیسلام بژین هەر (دەنگ) یان دێ‌ و (جورئەت) ناكەن تەواو ئەوفەلسەفە سیاسیە، یان تا بۆ ئایدۆلژیا نادینیەكەی باوەڕیان پێ‌ یە بە دروستی گوزارشتی لێبەكەن.

ڕۆژئاواییەك دەڵێ‌: ئەوانە وەك بۆق وان هەر (قیڕەیان) دێت، هەركە لێیان نزیك دەبیەوە بۆ ئەوەی بزانی چی یان دەوێ‌ (بێ‌ دەنگ) دەبن.

هەر لەسەر ئەو شەنكست و بنەمایانە هەمو هزرو ئایدۆلۆژیاو فەلسەفەیەكی سیاسی ڕۆژئاوای بە (ڵێڵ)ی لە ڕۆژهەڵات قسەی لە سەر كراوە.

دیتن و تێڕوانینی ڕۆژهەڵات و ڕۆژئاوا وەك یەك نەكارێكی ئەكادیمیە نە ڕوئیایەكی دروستە، چونكە ئەو (دووە) لەلایەن تیۆرداڕێژەرانی ڕۆژئاواوە وا (وێنا) كراون دەبێ‌ هەر لە ململانێ‌ دابن!

بۆ ئەوەی لە چوارچێوەی ناونیشانەكەوە دەرنەچین با لە سیكۆلاریزم بدوێین. لە ڕۆژئاوادا بەڕاشكاوەی لە ڕوی زاراوەو چەمك و زمانەوانیەوە دان بەوە دەنێنن، كە سیكۆلاریزم بزاڤێكی نا دینیە ـ فەرهەنگی ئۆكسفۆرد وشەی (secuiav) ئاوا ڕاڤە دەكات: دنیایی، مادی، نائاینی، حكومەتی دژ بەكەنیسە ... نابێ‌ ئاینیش بنەمای ڕەوشت و پەروەدە بێ‌، هەروەها لە (Brifsh Brifunica_ Encyclopedia ) دەربارەی سیكۆلاریزم ئەوها هاتوە: بزاڤێكی جڤاكیە ئامانجی گۆڕینی ڕەوتی بایەخدانی خەڵكە لە بایەخدان بە (ئاخیرەت وقیامەت) بۆ بایەخدان بە دنیا لەوێ‌ (دین) و (پیاوی دین) و (هەژمونی دین) و (پەیوەندی پیاوانی دین) و (دەسەڵاتی سیاسی) وڵات گەورە ترین هەڕەشە بون لە زات و ڕوئیاو هزری مرۆڤەوە ــ لەوێ‌ كۆمەڵێك وەك هۆكاری هزری و سیاسی و و شارستانی و كۆمەڵایەتی و ئابوری هەبون بۆ ئەوەی زاناو ڕۆناكبیرو سیاسەتمەدارانی ڕۆژئاوا پشت لە كەنیسە بكەن و حكومەت لە بونیاتی نادینی دامەزرێنن!

بێگومان ئەو هۆكارانە لە ڕۆژهەڵات دەرنەكەوتون بۆ ئەوەی لە ڕۆژهەڵات شۆڕشێكی سیكۆلاریزم بەرپابكرێ‌. ئەمە وەنەبێ‌ ڕای كەسانی دەرەوەی بازنەی سیكۆلاریزم بێ‌، بەڵكو هەتا لە ناو توێژەرانی ئەو بوارەش ڕایەكی ئەوها هەیە، پڕە لە ئاماژە بەڕای علی حەرب و محمدئەرگۆن و حەسەن حەنەفی دەكەین ئەو سێ‌ یە باوەڕیان وایە بنەماكانی سیكۆلاریزم لە ئیسلام دا هەن، علی حەرب لە (نقدالحقیقە) بانگەشەی ئەوە دەكات، كە لە سەردەمی دەوڵەتی مەدینەوە بنەماكانی (عەلمانی) لە گوتاری ئیسلامی دەركەوتون ئیسلام هەڵگری كۆمەڵێك واتاو دەلەلاتی جیاوازە لە هەناوی خۆشیدا شتێك لە عەلمانیەتی هەڵگرتوە.

محمد ئەرگۆن هەوڵی دەدا لە دەقە پیرۆزەكاندا هەندێ‌ ئەدگارو سیما بدۆزێتەوە بۆ ئەوە ڕاڤەو تەئویلێكی (عەلمانیبونی) ئیسلامی پێ‌ بكات ئەرەگۆن لە (الفكر الإسلامی قرا‌وە علمیە) دەڵێت: عەلمانیەت لە هەناوی قورئان و ئەزمونی مەدینەدا بونی هەیە، هەروەها دەوڵەتی ئەمەوی و عەباسی دەوڵەتی عەلمانی بون نەك ئاینی، لە لایەكی تر بە حكومی ئەوەی هزری ئیسلامی و شەریعەت و فقه زادەی بیركردنەوەو خوێندەنەوەی و تێڕوانینی مرۆڤن بۆ هەردوو دەقی قورئان و فەرمودە، بۆیە مرۆڤ بەشدارە لە شرۆڤەكردنی و بڕیاردان. هەروەها هەر چوار مەزهەبی سونی بەڵگەن لە یاساغ نەكردنی عەقڵی مرۆڤ لە خوێندنەوە و تێگەیشتنی دەق و تیۆری قیاس(Anulogg) بۆ دەرەوەی دەق...

ئەوانە توێژەرێكی وەك حەسەن حەنفیان وەلێكردوە لە كتێبی (الإسلام لا یحتاج علمانیە غربیە) بنوسێ‌ شەریعەتی ئیسلامی شەریعەرتێكی وەزعیەو لە سەربنەمای بەدیهێنانی بەرژەوەندیە گشتیەكان، كە تایبەتمەندی شەریعەتن: (زەرورات، حاجیات، تەحسینات) دامەزراوە عەلمانیەكانیش بۆ بەرجەستە كردنی ئەمانە كاردەكەن، بەڵام لە شارستانیەتی خۆرئاوای وەردەگرن نەك شەریعەتی ئیسلامی.

ئەم جۆرە تێڕوانینە بۆ هەبونی بنەماكانی سیكۆلاریزم لە قورئان و ئەزمونی ئیسلامدا خۆی لەخویدا نیفاقێكی سیاسیە، چونكە ئیسلام دین و دونیایە، حوكمی ئیسلامی حوكمێكی دینی كەهنوتی نیەو هیچ حوكمڕانێك (پیرۆز) نیە دنیاو بەشەكانی دونیا لە دین جودا ناكرێنەوە و ئەو (دونیا) ی لە قورئاندا وێناكراوە (دنیا)یەی سیكۆلاریزم نیە، لەم ڕوانگەوە هەر لێڵی و نیفاقەكەی ڕۆشەنبیری نادینی ڕۆژهەڵاتی دەردەكەوێ‌، كە دەیەوێ‌ لە هەردوو (بەر) بخوات.

هەروەك چۆن هەمو (عەلمانیەكانی) ڕۆژئاوا وەك یەك نین، ئەوانەی ڕۆژهەڵاتیش هەروان، بەڵام ئەوەندە هەیە، ئەو عەلمانیەتە (pavtial secularism) و عەلمانیە هەمووێی: (Total secularism) حكومەتەكانی ڕۆژئاوا لە سەر بنەمایەكی فەلسەفی و پێكهاتە تەكنیكی و كەلتوری و ئاینیەوە داڕێژراوە، هەرچی ئەوە ڕۆژهەڵاتە لە بنەمای نیفاقی سیاسی (politicalHyqecracg) و هەڵپەرستی (opparfunifg)دامەزراوە.

 

حزبی كوردی و ئەزمونی سیكۆلارزمی

بیرۆكەی حیزب دروستكردن، بیرۆكەیەكی ڕرژئاواییە، ئامانجی سەرەكی ئەو دیاردەیە هەوڵدانێك بوە بۆ ئەوەی ڕۆژئاوا لە ڕێگایەكی ترەوە هەژمونی بەسەر ڕۆژهەڵاتەوە هەبێ‌، كورد زیاتر لە ئەزمونی حیزب دروست كردندا زیاتر هەر لاسایی ئەزمونی نەتەوە باڵاكانی كردۆتەوە.

یەكەم بەشداری چالاكی كوردی لە حیزبی نەتەوەیی دا بوە، گروپی ئیتحادو تەرەقی و گەنجە توركەكان چەند كوردێكی وەك: عبدالله جەودەت، ئیسحاق سكوتلی ناویان دێت.

دكتۆر عبدالله جەودەت یەكێ‌ لەو كوردە بەرایانەی ناو كاری حیزبی عەلمانیە، كە تەواو لە ژێر كاریگەری ئەژمونی ڕۆژئاواو ماركسیەت دابووە لە باكوری كوردستان ئەو دەرفەتە لە بەردەم كەسانی وەك دكتۆر عبدالله جەودەت دروست نەبو، كە بتوانێ‌ پەرە بە هزرو ئایدۆلۆژیایی عەلمانیەت بدات.Secolar

ئەو حزبە كوردیانەی لە دوای جەنگی یەكەمی جیهانی لە باكور دروست بون، وەك جەمعیەتی تەعالی كوردستان، پارتی دیموكراتی كورد، كۆمەڵەی ئازادی، كۆمەڵەی خۆیبون خاوەن فەلسەفەیەكی سیاسی ڕون نەبون، ڕاستە ئەوانە (ئاینی) نەبون، بەڵام (عەلمانی)یش نەبون هۆیەكەش دەگەڕێتەوە بۆ ڕۆڵا و هەژمونی سەركردە كلاسیكەكان و بنەماڵە دیارەكانی نێو بزاڤی ڕزگاریخوازی كوردی!

 

 

دامەزراندی حزبی شیوعی عێراقی

سەرەتای دروستبونی بیرۆكەی عەلمانیەت بو لە كوردستان پێش دروستبونی پارتی دیموكراتی كورد لە ساڵی 1946، زۆربەی سیاسەمەدارانی كورد (شیوعی) بون جا چ شیوعی ناو شۆڕش، حزبی ڕزگاری بوبن.

شیوعیەت لە دوای دروستبونی پارتی بە ئاڕاستەیەكی تردا چو، چونكە بە شێكی زۆر لە شیوعیە كوردەكانی ناو حزبی شیوعی و (شۆڕش) و(ڕزگاری) بونە پارتی!!

ئەمەو وەنەبێ‌ ئەو شیوعیانە دەست بەرداری ماركسیەت بوبن، بەڵكو ئەوانە لە بەر ڕۆشنای ماركسیەت، خەریكی كوردایەتی بون.

بزاڤی (شیوعیەت) و (ماركسیەت) هەتا دروست بونی (كۆمەڵەی ماركسی لینینی) لە ساڵی 1970 نەیتوانی بەسەر مۆڵكی دینداری كۆمەڵی كوردەواری زاڵ بن، هەر لەم ڕوانگەوە شیوعیەت لە كوردستان زیاتر مۆركێكی سیاسی وەرگرتوە نەك ئایدۆلۆژی، هەروەها كادیری شیوعی خاوەن ڕوئیایەكی دیار نەبون، هەمو شیوعیەكان زیاتر بە ململانێی چینایەتی نێوان

(ئاغا)و (كرمانج) كورت كردۆتەوە. شوعیەت خۆی لە خۆیدا عەلمانیەتێكی ئیلحادیەو پرسی ئیلحادیەكەش لەسەر چەند بنەمایەكی مەتریالی بینا كردووە وەك دەڵێت:" لاإله والحیاە مادە" هیچ خودایەك نییەو ژیان مادەیە، بەڵام زۆرێك لە شیوعی كلاسیكی كوردی نەك هەر ئیلحادی نییە، بەڵكو پەیوەستە بە زۆرێك لە پایەكانی ئیسلام! ئەو ئیزدیواجیەتە هۆكارێك بوو بۆ مردنی شیوعیەت وەك فەلسەفەیەكی سیاسی یان ئایدۆلۆژیایەكی سیاسی. هەرچەند پیاوانی ئینگلیز ناو و ناتۆرەی "مەلای سور" یان لە مەلامستەفا دەنا، ئەو دەسەڵاتەی بارزانی لە بڕیاری سیاسی پارتی دا، مەكتەبی سیاسی پارتی- كە زۆربەی ماركسی بوون- ناچاركرد گەورەترین هەڵەی سیاسی و خیانەتی نەتەوەیی لەمێژووی سیاسی كوردی تۆماربكەن.

لە ناو دەسەڵاتی ڕژێمی عێراقیش لە ڕێگای گۆڤاری (ڕزگاری) و ڕۆژنامەی (النور) هەر خەریكی بڵاوكردنەوەی ماركسیەت و بزاڤی (ماوی) بوون. بەشێك لەو گروپە بەوەندە چالاكیە هزریە ڕازی نەبوون، بۆیە كۆمەڵەی ماركسی لینینی یان دامەزراند. ئەوانە وەك شیوعیەكانی ناو حیزبی شیوعی، شۆڕش، ڕزگاری و پارتی نەبوون خاوەن فەلسەفەیەكی ئیلحادی بوون باوەڕیان بە عەلمانیەتیەكی تەواو هەبوو، ئەوانە هەتا هەرەسی 1975، بوونێكی ئەو تۆیان نەبوو هەروەها لەلایەن خەڵك و شۆڕشی كوردییەوە بە بەشێك لەمەكتەبی سیاسی پارتی : جەلالی دادەنران بۆیە هەرەسی شۆڕشی ئەیلول و پارچە پارچە بوونی پارتی دەرفەتی زێڕینی بۆ خۆشكردن بۆ ئەوەی ئاڕاستەی سیاسی شۆڕشی كوردی بەئاقارێكی تردا ببەن. كۆمەڵەی ماركسی لینینی، لەساڵی 1973- ەوە لەڕیگای بڵاوكراوەی (ئاڵای سوور)ەوە ئایدۆلۆژیای سیاسی خۆیان بڵاو دەكردەوە. ئەوان لە ڕێگای جەلال تاڵەبانی یەوە تەبەننی ئایدۆلۆژیای سیاسی ماوتسی تۆنگ یان كرد. ئەندامە چالاكەكانی یان سەركردەكانی، جگە لە تاڵەبانی باوەڕیان بە ئایدۆلۆژیای سیاسی هەردوو باڵی پارتی و هەردوو باڵی حیزبی شیوعی عێراقی نەبوو.

كۆمەڵە، هەر لە ناوەكەی دەردەكەوێ كە پەیڕەوی ئایدۆلۆژیایەكی تووندی دەكرد تەواو لە سەر باوەڕی ئیلحادی دەمەزرابوو. لەپاش هەرەسی شۆڕشی ئەیلول و مانەوەی حیزبی شیوعی عێراقی لەناو بەرەی بەعس، دەرفەتێكی تر درووست بوو ئەو كۆمەڵەیە لەسەر هەرسێ بنەماكەی حیزبەكەی ماوتسی تۆنگ: حیزبی پێشڕەو، حیزبی گەل، بەرەی نیشتیمانی، جاڕی شۆڕشی خۆیان بدەن: لەبارەی بڵاوكردنەوەی بیرۆكەی چەپ و عەلمانیەتی ئیلحادی هیچ ڕێكخراوێكی عەلمانی كوردی بەقەد كۆمەڵەی نەكردووە. لەبەرایی، ئەوانەی لەماركس، ماركسی تر بوون، لەتووندی لە (ستالین) و (لینین) تووندتر بوون بەرامبەر دژەكانیان.

هەرەسی شۆڕشی ئەیلول و ماڵوێرانی و نەهامەتی و پاشاگەردانی و داڕووخانی كەسایەتی كوردی بوونە فاكتەرێكی ستراتیژی بۆئەوەی كۆمەڵە زەبری خۆی لە كەسایەتی بارزانی و هەژموونی ئاینی لەناو شۆڕشی كودردی بدات!

بەحوكمی ئەوەی لە حەفتاكان بە بارزانی دەوترا مەلا مستەفاو هەروەها بەڕاسپاردەی ئەو یەكێتی زانایانی ئیسلامی كوردستانی درووست ببوو و لە نەزەر كۆمەڵەش، ماركس وتەنی : "دین ئەفیونی- تریاكی گەلانە" بۆیە هەر هۆكاری شكستی شۆڕشی ئەیلولیان نە دەدایە پاڵ، كە هیچ بنەمایەكی نەبوو. جارێ خۆی مەلا مستەفا مەلایەتی نەكردووە، بەڵام لە بنەماڵەیەكی ئاینی یاخود مەزهەبی پێگەیشتبوو. ئەویان بە هۆكارێك دادەنا بۆئەوەی ڕەخنە هەتا لە ترادسیۆنی دین بگرن. لەهەشتاكان، ماركسیەكی برادەرم، كە تەواو بەبێ ئاگا لەژێر كاریگەری گوتویەتی ئەو ڕەوتە عەلمانییە بۆی گێڕامەوە، كە پاش ئەوەی بارزانی (دە)ساڵ لە سۆڤیەت، لینین بە دزی دەچێتە سەردانی، دەبینێ بارزانی خەریكی قورئان خوێندنەوەیە، لینین پێی دەڵێ : ئەوە دە ساڵە لە سەنتەری شیوعیەت دەژی هێشتا قورئان دەخوێنیتەوە؟!

ئەوەی شارەزای مێژووی چوونی بارزانی بۆ سۆڤیەت و ژیاننامەی سەرانی سۆڤیەت نەبێ مەسەلەكە ئەوەندە گرنگ نابینێ، وادەزانێ لینین قەبوڵی ئەو ڕەوشەی نەكردووە!

بارزانی خۆی لە 18/6/1947 لە ئاوی ئاراس پەڕییەوە و (لینین) لە ساڵی 1924مردووە!! لە ساڵی 1957 نەك لینین بەڵكو (جۆزێف ستالین)یش لە ژیاندا نەمابوو، ستالین لە ساڵی 1953مرد!!

عەلمانیەتی كۆمەڵە سەرەتایەكی لە ڕەوتی عەلمانیەتی ماركسی – ئیلحادی لە كوردستان درووست كرد كە بە هیچ جۆرێ بەراورد ناكرێ بەو عەلمانیەتەی شیوعیەكانی كوردستان كاریان لەسەر دەكرد. سیكۆلاریزم لەناو بزاڤی ماركسیەتدا هۆكارێك بووە بۆ چەندەها ئینشیقاقی سیاسی. هەرخودی كۆمەڵە لەژێر كاریگەری ماركسیەتی ماویی دا دوو جار تووشی جیابوونەوەی سیاسی بووە. جاری یەكەم، فازلی مەلا محموود یەكێ لە سێ دامەزرێنەرەكەی كۆمەڵە- دووەكەی تر شەهابی شێخ نووری و فەرەیدون عبدالقادر بوون- و فوئاد قەرەداغی لەسەر پەسەند كردنی "عێراقچێتی" لەسەركردایەتی دەركران و لە هەشتاكانیش جارێكی تر مەسەلەی "عێراقچێتی" و كوردستانچێتی كۆمەڵەی بۆ دووباڵی نەوشێروان و مەلابەختیار دابەشكرد!!

عەلمانیەتی ماركسی وەك پەتایەك بەر بووە گیانی حیزبی كوردییەوە بەجۆرێ زۆربەی جیابوونەوەكان لەسەر ئەو بنەمایە: جیابوونەوەی پارتی گەل لە پارتی، جیابوونەوەی زەحمەتكێشان لە شۆسیالست و جیابوونەوەی شیوعیەكوردستانییەكان – پارتی كار- لەحیزبی شیوعی عێراق!! ئەو كەلتورە حیزبەكانی ڕۆژهەڵات و باكوری كوردستانیشی گرتەوە. لە هەمووشی گرنگتر، زۆرجاران ئەو جیابوونەوانە "عەلمانیانە!!!"نەبووە بەڵكو "ستالینانە" بووە!!

 

لە عەلمانیەتی حیزبەوە بۆ عەلمانیەتی ڕۆشنبیری

ئەزموونی عەلمانیەتی حیزبی كوردی لەشاخ، مێژووێك نی یە كەس شانازی پێوە بكات، چوونكە ئەو ئەزموونە دوور بووە لە هەموو بنەماكانی عەلمانیەت و عەقڵانیەت، یەكتر قەبووڵكردن، یەكترخوێندنەوە، حیزبایەتی مۆدێرن. كاتێ نەوەی نوێ ڕەوشی سیاسی لە كتێبەكانی نەوشێروان مستەفا، مەلا بەختیار، ئەبو شوان، فاتیح ڕەسول، حەمەی حاجی مەحمود، سامی عبدالرحمان ...هتد دەخوێنێتەوە هەست بە هۆڤانیەتێكی چاخەكانی ناوەڕاستی ئەوڕوپا دەكات!! ئەو كەلتورە دوور لەهەموو بەها ئینسانیەكان لە دوای ڕاپەڕینەوە بۆ ناو شاری كوردیش گواسترایەوەو ئەزموونی هەڵبژاردن و پەڕلەمان و حكومەتی كوردی خرانە ناو بازنەی گومانەوە! بە (ڕا)ی من ئەگەر بڕیاری (986)ی نەتەوە یەكگرتووەكان، كە ناسراوە بە "نەوت بەرامبەر بە خۆراك" نەبوایە حیزبی كوردی نەك هەر هەڕەشەیان لە ئەزموونی حكومڕانی مەدەنی كوردی دەكرد، بەڵكو جارێكی تر ئەو بەشەی كوردستانیان بۆچەند ئیمارەتێكی عەشیرەتی دابەش دەكرد!!

ئەو بڕیارەی (un)، خەڵكی لە بەشێك لە نەهامەتییەكان ڕزگار كرد لە هەمووش گرنگتر بەشێكی ئەو بودجەیەیە لەڕێگای هەندێ گەندەڵی ناو (un)ەوە كەوتە دەستی هەردوو حیزبی دەسەڵاتدار، ئەمەش بووە هۆكارێ هەندێ لەسەرانی دەسەڵاتی كوردی بەرژەوەندی هاوبەش كۆیان بكاتەوەو چی تر سەر لوتكەكان لەیەكتری نەگرن هەروەها ئیدارەی جۆرج بۆش هۆكارێكی تر بوو، شەڕی ناو خۆ دووبارە نەبێتەوە!! لەپاش بێ دەنگكردنی تفەنگەكان، ئاڕاستەی ئەو قەڵەمانەی كە لە شەڕی ئایدۆلۆژیا دۆڕاندبوویان بەناوی مۆدێرنیتەوە شەڕێكی تریان لەناو كۆمەڵگای كوردییەوە بەرپاكرد. ئەو شەڕە، شەڕی مەعلوماتی و زانیاری مۆدێرنیتە نییە، بەڵكو شەڕێكە لەگەڵ كەلتوری كوردی و ئاینی كوردەوە دەكرێ.

زۆرجار وا ڕێك دەكەوێ كە تفەنگەكان بێدەنگ دەبن و خەڵك بژێوی باش دەبێ و جۆرێك لە خۆشگوزەرانی بەرپا دەبێ، هۆكارێك دەدۆزرێتەوە بۆقسەكردن لەسەر هەندێ ڕەوش و هێماو كەلتوری میللەتەوە. بەشێك لە نوسەرانی عەلمانی كوردی، كە زۆربەیان ئاستی ڕۆشنبیریان لەمەڕ ئاین – ەوە زۆر لاوازە بەجۆرێ نەك لە هەندێ دەقی قورئانی ناگەن، بەڵكو ناشزانن بیخوێننەوە. ئەو كارەی ئەوان كە بەناوی عەلمانیەتەوە دەیكەن خوێندنەوەی خۆیان نییە بۆ چەمكە ئاییەنیەكان, بەڵكو ئەوەی هەندێ عەلمانی عەرەب و فارس لە ڕۆژهەڵاتناس و نوسەرانی ڕۆژئاوایان وەرگرتووە، بۆكوردی وەردەگێڕێ و بەناوی خۆیانەوە وەك خوێندنەوەی عەقڵی كوردی بڵاودەكەنەوە. ئەو ڕەوتە عەلمانیەی كورد دەیەوێ لە دیدگای ناصر ئەبوزێد، علی حەرب ،محمد ئەرگۆن و محمد جابری و هەتا هاشم صالحەوە لە كەلتوری كوردی و قورئان بدوێ!! بەواتای ئەوەی هەتا ئێستا عەلمانیەتێك لە كوردستان درووست نەبووە كە دەرهاویشتە و زادەی بیركردنەوەو تێڕوانینی كوردی بێ، هەروەك لە (حیزبكاری) و (ماركسیەت) كورد چاوی لە عەرەب و تورك كردەوە لەمەسەلەی عەلمانیەتی مەدەنیش، ڕۆشنبیری دەرەوەی بازنەی دین خەریكە چاو لەو بزاڤە دەستكردەی عەرەب و فارسەكان دەكاتەوە هەرئەمەش وایكردووە لە سەردەمی ئێستادا بیرمەندێكی كورد لە بواری سیاسەت و مەسەلە جڤاكییەكان درووست نەبێ؟!

لێدوان زیادکە


بابەتە پەیوەندیدارەکان

هاوڕێمان بە لە فەیسبوك



دواین لێدوان

دیزاینکراوە لەلایەن گروپی ٢٤

joomla statistics